साउन ५, काभ्रेपलाञ्चोक । काभ्रेपलाञ्चोक जिल्लामा डेङ्गुको उच्च जोखिमका रूपमा रहेको सङ्क्रमण रोक्न पूर्वतयारी सुरु गरिएको छ । यसका लागी ‘समयमै जोखिमलाई न्यूनीकरण गरौँ’ भन्ने अभियान जिल्ला स्वास्थ्य कार्यालयले चलाएको छ । 

जिल्ला स्वास्थ्य कार्यालयका प्रमुख डा पुरुषोत्तम सेढाईँले काभ्रेपलाञ्चोक डेङ्गुको उच्च जोखिममा रहेकाले नियन्त्रणका लागि पूर्वतयारीका साथ कार्ययोजना तयार पारिएको बताएका छन । पुर्व तयारी अन्तर्गत सवारीसाधन मर्मत गर्ने ठाउँ, लामखुट्टेले बसोबास गर्न सक्ने सम्भावित ठाउँ, पानी जम्ने ठाउँ, उद्योग, कलकारखानालगायत ठाउँमा नियमित सरसफाइ गर्ने तथा पानी जम्न नदिन अभियान सञ्चालन गरिएको छ ।

काभ्रे जिल्लामा हालसम्म छ सय ८० जनामा डेङ्गु देखिएको छ भने सबैभन्दा बढी बनेपा नगरपालिकामा चार सय ८७ डेङ्गु सङ्क्रमित रहेको स्वास्थ्य कार्यालयले जनाएको छ।

डेङ्गुबाट बच्न स्वास्थ्य कार्यालयले प्राविधिक र उपलब्ध आपूर्ति व्यवस्था मिलाउने, लामखुट्टेको बासस्थानको ‘खोज र नष्ट गर’ राष्ट्रिय अभियान सञ्चालन गर्ने, स्थानीय तहका स्वास्थ्य शाखा, विद्यालय र स्थानीय स्वास्थ्य संस्थालाई डेङ्गुविरुद्धको प्रतिकार्य सञ्चालन गर्न आग्रह गरिएको छ । 

• न्युज बहार संवाददाता