असोज २७,
मुस्ताङ । मुस्ताङ जिल्लाको मौलिक कला र त्याँहाको संस्कृति पर्यटक आकर्षित गर्ने मुख्य
माध्यम बनेको छ । मुस्ताङका बासिन्दाले प्राकृतिक र धार्मिकसँगै परम्परागत मौलिक
कला र संस्कृतिको जगेर्ना गरेर पर्यटक भित्र्याउने माध्यम बनाएका हुन् ।
घरपझोङ
गाउँपालिका–५ को
ठिनीको थकाली सामुदायिक होमस्टेका सञ्चालक जुमा थकालीले मुस्ताङमा तीर्थयात्री र
पैदलयात्री मात्र नभएर रहनसहन, संस्कृति, जीवनशैलीको अध्ययन, अवलोकनका लागि समेत पर्यटक आउने गरेका
बताइन् ।
उनले भनिन्, “पृथक भूगोल, दामोदरकुण्ड, मुक्तिनाथ, कागबेनी जस्ता धार्मिक स्थल र ऐतिहाँसिक दरबार मात्र नभएर बस्तीअनुसार फरक फरक संस्कृतिको पनि अवलोकन गर्न पाइने त्यस्तै कुमार जात्रा, भदौरे, थार्तुङ, लामा नाच, तिजी, फागुपूर्णिमाका अवसरमा देखाइने मौलिक गीत तथा नृत्यले बसाई लम्बाउन र पर्यटक आकर्षित गर्न सहयोग मिलेको छ ।”
थकालीका अनुसार प्रचारप्रसार, सडक यातायातको सुविधा आदी कारण परम्परागत सांस्कृतिक मेला पर्वमा पर्यटकको सहभागिता बढेको छ । वर्षमा एक पटक मुस्ताङको प्रमुख गुम्बाहरुमा लामा नाच हुने गर्छ । असोज २३ गते मंगलबारदेखि कुछप तेरङ्गा गुम्बामा लामा नाच प्रर्दशनीका लागि पुजाआजा सुरु गरिएको छ ।
पर्यटकीय गन्तब्यको रुपमा विकास भएको ढुम्बा तालको नजिकै डाडामा रहेको गुम्बा परिसरबाट मार्फा, जोमसोम, ठिनी, स्याङ लगायतका भूगोलको मनमोहक दृष्य सजिलै अवलोकन गर्न सकिन्छ ।
यस्ता धार्मिक महत्व बोकेका लामा नाच अवलोकन गर्न आएका देश तथा विदेशबाट पर्यटकहरुको राम्रो उपस्थित रहने गरेको छ । पर्यटकहरुले मुस्ताङ भ्रमणका क्रममा प्रकृति र धार्मिक सँगै फरक संस्कृतिको बारेमा जानकारी लिन पाएकोमा खुसी व्यक्त गर्ने गरेका छन भने धेरै वर्ष पुरानो संस्कृति अझै जिवित देख्दा पर्यटकहरु दंग पर्ने र यसको प्रचारप्रसार गर्ने गरेका छन।
- न्युज बहार संवाददाता
