भदौ ८, म्याग्दी । पर्यटनमार्फत म्याग्दी जिल्लाको अन्नपूर्ण गाउँपालिकाले रु एक करोड ३० लाख बढी आन्तरिक आम्दानी गर्न सफल भएको छ । गाउँपालिकाले चालु आर्थिक वर्षमा गाउँपालिकाभित्र रहेका पर्यटकीयस्थललाई आय ठेक्कामा लगाएर उक्त आम्दानी गर्न सफल भएको हो ।

गाउँपालिकाले पालिकाभित्र रहेका चर्चित पर्यटकीयस्थल पाउद्वार तातोपानी कुण्ड, भुरुङ तातापानी र पुनहिललाई आय ठेक्का लगाएको मोहरेडाँडा, खोप्रा, घोरेपानीलगायतका पर्यटकीयस्थलमा सञ्चालित होटलबाट व्यवसाय कर सङ्कलन गर्न लागेको गाउँपालिकाका प्रमुख प्रशासकीय अधिकृत अमृत सुवेदीले जानकारी दिएका छन ।

अन्नपूर्ण गाउँपालिकाले चालु आर्थिक वर्षमा रु एक करोड ४७ लाख आन्तरिक आय सङ्कलन गर्ने लक्ष्य राखेकोमा वर्षको सुरुआतमा नै लक्ष्य नजिकको राजस्व सङ्कलन गरिसकेको छ । गाउँपालिकाले गत आर्थिक वर्षमा रु एक करोड ४५ लाख आन्तरिक राजस्व सङ्कलन गर्ने लक्ष्य राखेकोमा लक्ष्यभन्दा बढी रु एक करोड ६१ लाख राजस्व सङ्कलन गरिएको थियो ।

• न्युज बहार संवाददाता