असोज १३, काठमाडौँ। पितृ पक्ष अर्थात् सोह्र श्राद्ध आजदेखि आरम्भ भएको छ । नेपाल पञ्चाङ्ग निर्णायक विकास समितिले आजै प्रतिपदा र द्वितीया तिथि श्राद्ध गर्नुपर्ने स्वीकृति दिएको पात्रोमा उल्लेख छ ।
समितिका सदस्य प्राडा देवमणि भट्टराईले प्रतिपदा तिथि श्राद्धको पिण्डदान अपराह्नसम्म गरिसक्नुपर्ने जानकारी दिए ।
दिवङ्गत पितृलाई सोह्रवटा तिथि आश्विन कृष्ण प्रतिपदादेखि आश्विन शुक्ल प्रतिपदासम्ममा पिण्ड, तर्पण र सिदादान गरिने भएकाले यस समयलाई सोह्रश्राद्ध भनिएको हो ।
वैदिक सनातन हिन्दू परम्पराअनुसार चाडपर्व, यज्ञ तथा ठूलाकार्य गर्नु अघि पितृलाई श्रद्धा भक्तिका साथ सम्झिन सोह्रश्राद्ध गर्ने गरिएको हो । शास्त्रीय मान्यता अनुसार आफ्ना सन्तानबाट सोह्रश्राद्धमा पितृले तर्पण, पिण्डको आश गरिरहेका हुन्छन् भन्ने छ।
- न्युज बहार संवाददाता
