असार ५, म्याग्दी । म्याग्दीको बेनीमा
आलुको ब्राण्डिङ गरिने भएको छ । नगरपालिका-३ भकिम्लीस्थित बेलढुङ्गा कृषि फार्मले
उत्पादन गरेको उन्नत जातका आलुलाई ‘बेलढुङ्गा’ ब्राण्डिङ गरेर बजार पठाइने भएको
छ ।
फार्मका
अध्यक्ष केयरसिङ पुनका अनुसार उक्त फार्मले सय रोपनी जग्गामा फलाएको आलु बेलढुङ्गा
ब्राण्डमा बजार पठाउने तयारी गरिएको हो ।
म्याग्दीको
भकिम्ली र बागलुङको धम्जाको सिमानामा पर्ने प्रसिद्ध पर्यटकीयस्थल हो ‘बेलढुङ्गा’ । २५ रोपनीमा उन्नत जातको जनकदेव
र रोजिटा जात र पचहत्तर रोपनीमा बर्खे जातका आलुखेती गरिएकामा जनकदेव र रोजिटाको
उत्पादन प्रशस्त भएको छ ।
उक्त फार्ममा
स्वदेश तथा विदेशमा रहेका १९ जनाको लगानी रहेको छ । पुनका अनुसार खेतबारीदेखि
उपभोक्ताको भान्सासम्म भकिम्लीको आलुको ब्राण्ड स्थापित गर्नेगरी संस्थाको नाम, ठेगाना र परिमाण उल्लेख गरी
बजारमा लैजाने तयारी गरिएको छ ।
- न्युज बहार संवाददाता
