साउन २५, कास्की । पोखरामा आँखा पाक्ने रोगको सङ्क्रमण फैलिँदै गएपछी पोखराका अस्पतालले आँखाको परीक्षण र औषधि निःशुल्क प्रदान गर्न सुरु गरेका छन ।
यहाँका केही अस्पतालहरुमा पोखरा महानगरपालिकाको अग्रसरतामा साउन मसान्तसम्मका लागि आँखा जाँच तथा औषधि वितरणको व्यवस्था गरिएको हो ।
पोखराको चरक मेमोरियल हस्पिटल, मणिपाल शिक्षण अस्पताल र हिमालय आँखा अस्पतालसँग महानगरपालिकाले निःशुल्क आँखा परीक्षण तथा औषधि वितरणसम्बन्धी समझदारी गरेको छ ।
यी अस्पतालमा बिरामीलाई बिहान ९ बजेदेखि साँझ ५ बजेसम्म सेवा प्रदान गरिने छ । हिमालयन आँखा अस्पतालले महानगरको आग्रहमा सेवाका लागि टिकट निःशुल्क दिने भएको छ ।
अस्पतालका मेडिकल सुपरिटेन्डेन्ट प्रा डा इलिया श्रेष्ठले आँखा समस्याका बिरामीका लागि निःशुल्क टिकटको व्यवस्था गरिएको बताइन् ।
रोगको सङ्क्रमण नफैलियोस् भन्ने उद्देश्यले बुधबारदेखि शुक्रबारसम्म पोखरा महानगरले महानगर मातहतका सम्पूर्ण विद्यालय तथा शिक्षण संस्थामा बिदा दिने निर्णय समेत गरिसकेको छ ।
- न्युज बहार संवाददाता
