असार २७, कास्की । तल पोखरा उपत्यका, माथि हिमाल र त्यसको थुम्कोमा अर्मलाकोट गाउँ । बान्की मिलाएर धेरै ढुङ्गाले छाएको छानो त केही जस्तापाताले छाइएका घरहरु । ढुङ्गाकै बाटो, ढुङ्गाकै गारोले अर्मलाकोट गाउँ पहिचान दिलाएको छ । स्वच्छ हावापानी, शान्त वातावरणले धेरैको मन फुरुङ्ग बनाउँछ । पोखरा महानगरपालिका वडा नम्बर १६ मा पर्ने अर्मलाकोट गाउँ प्राकृतिक सुन्दरताले भरिपूर्ण रहेको छ ।
पोखरा सहरबाट १२ किलोमिटर टाढा रहेको अर्मलाकोट पछिल्लो समय पर्यटक र पैदलयात्रीहरुको रोजाइमा पर्ने गरेको छ ।
अर्मलाकोट घुम्न पुग्नेको सङ्ख्या दिनप्रतिदिन बढिरहेको छ । आगन्तुकहरुलाई परम्परागतरूपमा बनेका घर, यहाँ बस्ने गुरुङ र दलित समुदायको बोलीचाली तथा सरल व्यवहारले हृस्य देखीनै स्वागत गरिरहेको छ । गाउँमा विसं २०७५ मा होमस्टे सञ्चालनमा आएपछि छुट्टै रौनक भेटिएको छ ।
अर्मलाकोट गाउँको आकर्षक भनेको गाउँले जनजीवन, आफ्नै रहनसहन र परम्पराले भरिएको ढुङ्गेघरहरु हुन। पर्यटकलाई झनै मोहित बनाउने अर्को भाग भनेको घरका झ्याल र ढोकामा कलात्मक शैलीमा कुँदिएका फूलबुट्टा तथा आकृति हुन।
गाउँको ढुङ्गेघरले यहाँ पुग्ने पर्यटक मन लोभ्याएको बताउँने गरेका छन् ।
अर्मलाकोट होमस्टेकी अध्यक्ष बबिता गुरुङले पछिल्लो समय अर्मलाकोटमा घुम्न आउने पर्यटकको सङ्ख्या वृद्धि हुँदै गएको बताएकी छिन । वर्षाको समय भए पनि पर्यटक गाउँ उक्लनेको सङ्ख्यामा कमी नआएको उनी बताउँछिन ।
- न्युज बहार संवाददाता
