असार ६, पोखरा । आज पोखरा अन्तर्राष्ट्रिय विमानस्थलमा पहिलोपटक अन्तर्राष्ट्रिय उडान भएको छ।
पोखरा अन्तर्राष्ट्रिय विमानस्थलमा सिचुवान एयरलाइन्सले छिमेकी मुलुक चीनको छेन्दु–तियान्फु विमानस्थलबाट पोखरामा सिधा चार्टर उडान गरेको हो ।
विमानस्थलका सूचना अधिकारी विष्णु अधिकारीले सिचुवान एयरलाइन्सको एयरबस ए–३१९ जहाज बुधबार बिहान साढे ९ बजे पोखरा अन्तर्राष्ट्रिय विमानस्थलमा अवतरण भएको जानकारी दिएका छन।
यही असार ८ र ९ गते यो जहाज पोखराको फेवातालमा आयोजना हुन लागेको नेपाल चाइना ड्रागन बोट रेस फेस्टिभलमा सहभागी हुने खेलाडीसहितका यात्रु लिएर आएको पोखरा अवतरण भएको हो।
सिचुवान एयरलाइन्सको यो जहाज करिब दुई घण्टा पोखरा विमानस्थलमा रहेर बिहान ११ बजे काठमाडौँ हुँदै चीन फर्किने समय तालिका रहेको छ ।
- न्युज बहार संवाददाता
