चैत २, म्याग्दी । धार्मिक पर्यटकीयस्थल गलेश्वरमा फुटपाथसहितको सडक निर्माण गरिएको छ । गण्डकी प्रदेश सरकार र उपभोक्ताको लागत साझेदारीमा म्याग्दी जिल्लाको बेनी नगरपालिका–९ मा रहेको धार्मिक पर्यटकीयस्थल गलेश्वरमा फुटपाथ  सहितको अपाङ्गमैत्री तथा पक्की सडक निर्माण भएको हो । स्थानीयवासीका साथै गलेश्वरमा आउने भक्तजनलाई फुटपाथ सहितको सडक तथा अपाङ्गमैत्री मार्गको निर्माण भएपछि कालीगण्डकी नदीमा पुग्न र स्नान गर्न सहज हुने भएको छ । 

पाँच मिटर चौडाइ भएको १२५ मिटर लामो सडक ढलान सम्पन्न भएको गलेश्वर मन्दिरदेखि कालीगण्डकी नदी जाने बाटो निर्माण समितिका अध्यक्ष बमबहादुर पुनले जानकारी दिएका हुन । उनका अनुसार सडकको डिलतर्फ रेलिङ र स्लेट ढुङ्गा बिछ्याएर पैदलमार्ग बनाइएको छ  भने साँघुरो र उकालो ग्रेड नमिलेको सडकलाई पर्खाल बनाएर, भित्ता काटेर फराकिलोका साथै ग्रेड समेत मिलाइएको छ ।

यसरी पक्की सडक बनेपछि गलेश्वरको सभाहल र खेलमैदान सम्म सवारी साधन लैजान सकिने भएको छ ।  

• न्युज बहार संवाददाता