जेठ २३, काठमाडौँ । नेपाली क्रिकेट खेलाडी सन्दीप लामिछानेलाई अमेरिकाले भिसा नदिएको विषयलाई आज पनि राष्ट्रिय प्रजातन्त्र पार्टी (राप्रपा) संसदीय दलका प्रमुख सचेतक ज्ञानबहादुर शाहीले संसदमा उठाएका छन् ।

सचेतक शाहीले आज बुधबारको बैठकको शून्य समयमा बोल्दै प्रमुख टी–२० विश्वकपमा लामिछानेको ठुलो आवश्यकता महसुस भएको भन्दै अमेरिकी राजदूतसँग भिसा नदिएकोबारे प्रस्टीकरण सोध्नुपर्ने बताएका हुन ।

उनले प्रश्न गर्दै भने ‘नेपालले हिजो १० वर्षपछि टी–२० विश्वकप खेल्यो । नेपालको चन्द्र–सूर्य झण्डा सञ्चार भर फरफरायो । तर, बिडम्बना हामीले हिजो खेल हार्‍यौँ, सम्माननीय सभामुखमार्फत सरकारलाई सोध्न चाहन्छु – हिजोको खलेमा सन्दीप लामिछानेको ठुलो आवश्यकता महसुस भयो । उच्च अदालत पाटनले सफाइ दिएको, क्यानले स्वीकृत गरेको, आइसीसीले स्वीकृत गरेको एउटा खेलाडीलाई अमेरिका आयोजक देशले भिसा किन दिएन ? सरकारले त्यो देश अमेरिकाको राजदूतलाई प्रष्टीकरण  किन नलिएको ?’ 

उनले अगाडी भने ‘सरकारले यसको जवाफ दिनुपर्छ, याहाँ सन्दीप लामिछाने एउटा व्यक्तिको कुरा होइन, नेपाली क्रिकेट टिमको खेलाडी हो, नेपालको प्रतिनिधित्व गरेर विश्वकप खेल्न जाने हो, कुनै क्लबको खेल खेल्ने जाने होइन , त्यो भएकोले देशको जिम्मा हुन्छ ।’

• न्युज बहार संवाददाता