असार २८, काठमाडौँ । आज बिहीबारदेखि एसीसी इमर्जिङ टिम्स एसिया कप श्रीलंकामा सुरु भएको छ । प्रतियोगिताको पहिलो दिन समूह ‘ए’ का अन्तर्गत पहिलो खेलमा दुई टेस्ट राष्ट्र श्रीलंका र बंगलादेशका बिच प्रतिस्पर्धा हुँदैछ।
यी दुबै टोलीले आजको खेलमा आफ्नो ‘ए’ टोली सहभागी गराएका छन् । नेपालका बुद्धिबहादुर प्रधान आज हुने खेलमा अम्पायरको भूमिकामा छन् ।
भारत र ओमानका अम्पायर पनि प्रधानसँगै उक्त खेलमा सक्रिय अम्पायरका भुमिकामा रहने छन् । हालसम्म प्रधानले ४४ एकदिवसीय खेलमा अम्पायर र एउटा एकदिवसीय खेलमा रेफ्रीको भूमिका निर्वाह गरिसकेका छन् ।
आज पहिलो दिन नै अफगानिस्तान र ओमानबीच पनि खेल हुँदैछ। पहिलो दिनको दुबै खेल अहिले जारी रहेको छ । बंगलादेशविरुद्धको खेलमा श्रीलंकाले ब्याटिङ गर्दैछ भने ओमानविरुद्धको खेलमा अफगानिस्तानले पहिले ब्याटिङ गरेको छ ।
- न्युज बहार संवाददाता
