पुस ५, काठमाडौँ । आजदेखि काठमाडौँमा प्रधानमन्त्री कप महिला राष्ट्रिय क्रिकेट प्रतियोगिता सुरु हुँदै छ ।

प्रधानमन्त्री कप क्रिकेट प्रतियोगिता राष्ट्रिय खेलकुद परिषद (राखेप) को वार्षिक कार्यक्रमअन्तर्गत हुन लागेको हो । नेपाल क्रिकेट संघ (क्यान)ले टी–२० ढाँचामा हुने खेलको व्यवस्थापन गरेको छ ।

प्रतियोगिता १४ दिनसम्म चल्नेछ । यस  प्रतियोगितामा ७ प्रदेश र विभागीय टोली एपीएफसहित ८ टोली सहभागी रहेका छन । यस  प्रतियोगिताका सबै खेलहरु मूलपानी र कीर्तिपुर र मैदानमा हुनेछन् ।

प्रतियोगिताको पहिलो दिन आज चार खेल हुँदैछन् । टीयू मैदानमा बागमती प्रदेश र मधेश प्रदेशबीच उद्घाटन खेल हुनेछ । यो खेल बिहिबार बिहान साढे ९ बजे सुरु हुनेछ । सोही समयमा मुलपानी मैदानमा एपीएफ र सुदूरपश्चिमबीच खेल हुनेछ ।

त्यसैगरी दिउँसो सवा १ बजे त्रिवि मैदानमा गण्डकी र लुम्बिनीबीच खेल हुनेछ भने सोही समयमा मूलपानी मैदानमा कर्णाली प्रदेश र कोशी प्रदेशबीच खेल हुनेछ ।

• न्युज बहार संवाददाता