चैत १५, काठमाडौँ । आजदेखि यो वर्षको माध्यमिक शिक्षा परीक्षा (एसईई) सुरु हुँदै छ । आज बिहान ८ बजेदेखि सुरु भएको परीक्षा २७ गतेसम्म जारी रहनेछ । यो वर्ष पाँच लाख चार हजार ४१४ विद्यार्थी परीक्षाले दिन फारम भरेको राष्ट्रिय परीक्षा बोर्डको तथ्याङ्कले जनाएको छ ।

परीक्षालाई शान्तिपूर्ण, मर्यादित र भयरहित वातावरणमा सम्पन्न गर्न–गराउने विद्यार्थी, शिक्षक, अभिभावक र सबै नागरिकमा कक्षा १० परीक्षा नियन्त्रण कार्यालयका एसईई परीक्षा नियन्त्रक नन्दलाल पौडेलले आह्वान गरेका छन् ।

यो वर्षको परीक्षामा सामुदायिक तथा संस्थागत गरी १० हजार ८०६ विद्यालयबाट विद्यार्थीले परीक्षा दिँने तथ्याङ्कले देखाएको छ । पौडेलका अनुसार जसमा दुई लाख ५३ हजार ६२७ छात्र, दुई लाख ५० हजार ७७२ छात्रा, र अन्य १५ जना गरी कूल पाँच लाख चार हजार ४१४ परीक्षार्थी सहभागी हुदै छन । कूल परीक्षार्थीमध्ये ५०६ विद्यालयका १५ हजार ७४९ जना विद्यार्थी भने प्राविधिक धारका रहेका छन् ।

देशभरका दुई हजार ६४ परीक्षा केन्द्रबाट परीक्षा सञ्चालन हुने छ भने नेपाल बाहिर जापानमा समेत एक परीक्षा केन्द्र तोकिएको छ । २३ जना विद्यार्थीले जापानबाट एसईई दिँदै छन् ।

• न्युज बहार संवाददाता