असोज १, काठमाडौँ । कालीगढहरुले प्रत्येक वर्ष कन्या अर्थात् आश्विन सङ्क्रान्तिका दिन आज विश्वकर्माको पूजा आराधना गरी वास्तु दिवस एवं विश्वकर्मा पूजा पर्व मनाउने गर्दछन ।
यो दिवसका अवसरमा विभिन्न कलकारखानामा विश्वकर्मा भगवान्को बालुवाको मूर्ति वा तस्वीरमा विधिपूर्वक पूजा आराधना गरिन्छ । यस दिन कलकारखानालाई विशेष रुपमा सजावट गर्ने र सरसफाई गरी मजदुरलाई समेत सहभागी गराएर पुजा गरिन्छ ।
यो दिवस अनुसार आजका दिन कालीगढले उपयोगमा ल्याउने विभिन्न औजारका सामानको पूजा आराधना गरेमा नबिग्रने धेरै समय टिक्ने र राम्रो काम गर्न सकिने लगायत गुण प्राप्त हुने विश्वास रहेको छ ।
यसै विश्वाससहित आज इञ्जिन जडान भएका यन्त्र सवारी साधनहरुको पनि पूजा आराधना गर्ने गरिन्छ ।
