चैत
१७, काठमाडौँ। आपराधिक अभियोगमा अमेरिकाका पूर्वराष्ट्रपति डोनाल्ड ट्रम्पविरूद्ध मुद्दा
चल्ने भएको छ।
द न्युयोर्क टाइम्सको समाचार अनुसार बिहीबार म्यानहटन ग्रान्ड ज्युरीले उनीविरूद्ध आपराधिक अभियोग लगाउने निर्णय गरेको हो। अमेरिकाका कुनै पनि बहालवाला वा पूर्वराष्ट्रपति जस्ता ठुला व्यक्ती माथी आपराधिक अभियोगमा मुद्दा चल्न लागेको यो पहिलो पटक हो।
पोर्न
स्टार स्ट्रोमी ड्यानियल्सलाई आफूहरूको सम्बन्धबारे चुप रहन ट्रम्पले सन् २०१६ को
राष्ट्रपति चुनावअघि १ लाख ३० हजार अमेरिकी डलर दिएको विषयमा अनुसन्धान भएको थियो।
सोही
अनुसन्धान अनुसार ट्रम्पमाथि अरू के-के मुद्दामा अभियोग लगाइएको छ भन्नेबारे
विस्तृत खुलिसकेको छैन।
सन् २०२४
मा फेरि राष्ट्रपतिको उम्मेदवार बन्ने दौडमा रहेका ट्रम्पलाई यो निर्णयले ठुलै धक्का
लाग्न सक्ने अनुमान गरिएको छ।
ट्रम्पले
अब स्वंयम अदालतसमक्ष आत्मसमर्पण गर्ने अपेक्षा पनि गरिएको छ भने उनी आगामी
मंगलबार अदालती प्रक्रियाका लागि अदालतमा पुग्ने जानकारी गराइएको छ।
आत्मसमर्पण नगरे उनलाई पक्राउ गरिने छ। तर पूर्वराष्ट्रपति भएकाले पक्राउ गर्न पर्दा उनलाई हतकडी लगाउने वा नलगाउने भन्ने बारेमा टुंगो लागेको छैन।
यता पूर्वराष्ट्रपति ट्रम्पले भने आफू निर्दोष रहेको दाबी गर्दै आएका छन। यो सबै पछिल्लो घटनाक्रमलाई उनले उग्र डेमोक्र्याटहरूको योजना भएको र आफूलाई फसाउने षडयन्त्र भएको बताएका छन्।
- न्युज बहार संवाददाता
