मंसिर २०, काठमाडौँ । मौसम पूर्वानुमान महाशाखाका अनुसार हाल नेपालमा आन्द्र प्रदेश आसपास रहेको मिचाउङ नामक सामुद्रिक आँधीका साथै पश्चिमी वायुको समेत आंशिक प्रभाव  रहेको छ । यसको प्रभावले हाल मधेस प्रदेश र कोशी प्रदेशका साथै  देशको पहाडी भूभागमा आंशिक देखि सामान्य बदली रहेको छ भने बाँकी भुभागमा मौसम सफा रहेको छ ।

आज बुधबार दिउँसो बागमती प्रदेश, मधेस प्रदेश र कोशी प्रदेशमा आंशिकदेखि सामान्य बदली  रही कोशी प्रदेशका एक–दुई स्थानमा हल्का वर्षाको समेत सम्भावना छ। कोशी  प्रदेशका उच्च पहाडी तथा हिमाली भूभागका एक–दुई स्थानमा हल्का हिमपातको सम्भावना पनि देखिएको छ ।

त्यसैगरी आज राति गण्डकी  प्रदेश, बागमती प्रदेश , मधेस प्रदेश र कोशी प्रदेशमा आंशिकदेखि सामान्य बदली रही देशका बाँकी भूभागमा आंशिक बदली देखि मौसम सामान्यतया सफा रहनेछ। राती पनि कोशी प्रदेशका र मधेस प्रदेशको एक–दुई स्थानमा हल्का वर्षा र कोशी प्रदेशको उच्च पहाडी तथा हिमाली भूभागका हल्का हिमपातको सम्भावना रहेको महाशाखाले जानकारी दिएको छ ।

• न्युज बहार संवाददाता