चैत २४, नुवाकोट । नुवाकोटको विदुर नगरपालिका–६ त्रिशूली नदीको पक्की पुलको लठ्ठा चुँडिएको छ । त्रिशूली नदीमाथीको पक्की पुलको लठ्ठा चुँडिएपछी आवागमन पूर्णरुपमा बन्द गरिएको छ ।

करिब ४० वर्षअघि देवीघाट जलविद्युत् केन्द्रको निर्माणको समयमा निर्माण भएको पुलका मुख्य चारमध्ये एउटा लठ्ठा चुडिँएको बताइएको छ। विदुर नगरपालिकाका प्रमुख राजन श्रेष्ठका अनुसार अहिले पुलबाट आवागमन बन्द गरिएको छ । 

विदुर नगरपालिकाका प्रमुख राजन श्रेष्ठले गत पुस पहिलो साता पुलको लठ्ठामा समस्या देखिएपछि दुईपाङ्ग्रे सवारीसाधनलाई मात्र पुलबाट आउजाउको अनुमति दिइएको बताएका छन । जतिसक्दो चाँडो मर्मतसम्भार गरेर पुल पुनः सञ्चालन हुने उनले प्रतिबद्धता व्यक्त गरेका छन । 

नगरपालिकाले विदुर नगरपालिका–४ बजारबाट सिधै विदुर–६ मान्द्रेढुङ्गा हुँदै तारकेश्वर गाउँपालिका र धादिङबेँसी पुग्ने छोटो  बाटोको प्रयोगकर्ताहरुले उक्त पुल बन्द भएपछि सिमचउर र देवीघाटस्थित बुनिबेँसीको पुल प्रयोग गर्न अनुरोध गरेको छ ।

• न्युज बहार संवाददाता