फागुन १७, काठमाडौँ । राष्ट्रपतिको निर्वाचनपछि मात्रै विश्वासको मत लिने तयारी प्रधानमन्त्री पुष्पकमल दाहाल ‘प्रचण्ड’ले गरेका छन्।

राष्ट्रपतिको निर्वाचनपछि मात्रै विश्वासको मत लिने स्थिति आएको नेकपा (माओवादी केन्द्र) संसदीय दलका प्रमुख सचेतक हितराज पाण्डेले बताएका छन।

सचेतक हितराज पाण्डेले भने ‘प्रधानमन्त्रीले उचित समयमा विश्वासको मत लिनुहुन्छ। प्रतिनिधि सभाको बैठक नै चैत ५ गते बोलाइएको छ, प्रतिनिधि सभा बैठकको मितिका कारणले समेत राष्ट्रपतिको चुनावअघि विश्वासको मत लिइँदैन भन्ने हो।’ राष्ट्रपतिको चुनाव फागुन २५ गते हुँदैछ।

प्रमुख विपक्षी दल आफू रहेको दाबी कांग्रेस र नेकपा (एमाले) दुबैले गरेपछि आज बस्ने भनिएको बैठक चैत ५ गतेसम्मको लागि सरेको हो।

कांग्रेसले आफू सरकारमा नगएसम्म प्रतिपक्षमै रहने अडान लिएको छ भने एमालेले सरकारलाई दिएको समर्थन फिर्ता लिइसकेको छ। संविधानको धारा १०० को उपधारा २ अनुसार विश्वासको मत लिन लागीएको हो। तत्कालीन गठबन्धनका दलहरू एमाले र राप्रपाले सरकारलाई दिएको समर्थन फिर्ता लिइसकेका छन ।

• न्युज बहार संवाददाता