चैत १०, काठमाडौँ ।  होली पर्वलाई मध्यनजर गरी जिल्ला प्रहरी परिसर काठमाडौँले सुरक्षा व्यवस्था मजबुत बनाएको छ। भोली आइतबार अर्थात चैत ११ गते पहाडमा र सोमबार चैत १२ गते तराईका विभिन्न जिल्लामा होली पर्व मनाइँदैछ । प्रहरीले होलीको लागि देशभरका सबै ठाउँमा सुरक्षा व्यवस्था मजबुत बनाएको हो । 

शनिबार होली पर्व आम नेपालीहरूको लागि मेलमिलापको पर्व भएकाले मर्यादित रूपमा मनाउन जिल्ला प्रहरी परिसर काठमाडौँका प्रमुख प्रहरी वरिष्ठ उपरीक्षक भूपेन्द्रबहादुर खत्रीले आग्रह गरेका छन । यसैबिच प्रहरीले विगतका घटनाहरूलाई मध्यनजर गरेर सुरक्षा प्रबन्ध मजबुत बनाएको जनाएका छन ।

खत्रीका अनुसार काठमाडौँमा काठमाडौँ परिसरका जनशक्तिहरू र उपत्यका ट्राफिक प्रहरी कार्यालयद्वारा संयुक्त रूपमा ९० भन्दा बढी स्थानमा संयुक्त चेकिङको व्यवस्था गरिएको छ । सम्भावित घटनाहरू हुन नदिनका लागि भिडभाड हुने ठाउँहरूमा ड्रोनबाट पनि निगरानी गर्ने तयारी गरिएको उनले जनाएका छन ।  

• न्युज बहार संवाददाता