भदौ १७, काठमाडौँ । पूर्व मिस नेपाल नम्रता श्रेष्ठलाई अभिनेता सलिनमान बनियाले राति एयरपोर्टमा रिसिभ गर्न गएको घटनाले केही समय सामाजिक सञ्जाल र मिडियामा चर्चा पाएको थियो। यसपछि यी दुईबीच प्रेम सम्बन्ध रहेको अड्कलबाजीसमेत फैलिएको थियो।

तर, हालै एक कार्यक्रममा बोल्दै नम्रताले यी गसिपहरू असत्य भएको स्पष्ट गरेकी छन्। उनले भनिन्, "यस्ता हल्ला न मेरो तर्फबाट आएका हुन्, न त उहाँको तर्फबाट। सानो विषयलाई अनावश्यक रूपमा ठूलो बनाइएको हो।"

नम्रताका अनुसार, त्यो दिन एक जना साथीको जन्मदिन परेको थियो र उनको फ्लाइट ढिला भएको कारण सलिनमान उनलाई लिन एयरपोर्ट गएका थिए। उनले थपिन्, "फ्लाइट साँढे ८ मा ल्यान्ड हुने भनिएको थियो, तर १० बज्यो। उहाँ कुरेर बस्नुभएको थियो। त्यसैलाई लिएर अफेयरको खबर बनाइयो, जुन देख्दा मलाई दुःख लाग्यो।"

नम्रताले आफू र सलिनमान एकदम मिल्ने साथी भएको बताउँदै, छिट्टै सार्वजनिक हुन लागेको फिल्मका कारण फेरि सँगै देखिन सक्ने जानकारी पनि दिइन्। उनले जोड दिँदै भनिन्, "त्यसमा हामीलाई अफेयरको रूपमा हेर्नु आवश्यक छैन।"

• न्युज बहार संवाददाता