बैशाख ७, काठमाडौँ । आइतबार राजधानीमा राष्ट्रिय प्रजातन्त्र पार्टी (राप्रपा)को आह्वानमा गरिएको प्रदर्शन सकिएको छ । राजसंस्थाको पुनर्स्थापना, संघीयताको खारेजी, भ्रष्टाचारलगायतको विरोधमा आयोजना गरिएको प्रदर्शन सम्पन्न भएको पार्टी प्रवक्ता मोहन श्रेष्ठले जानकारी दिएका छन ।
बिजुली बजारमा भेला भएर राप्रपाका नेता कार्यकर्ता नाराबाजीसहित प्रदर्शनमा सुरु भएको थियो । कार्यकर्ताहरु बिजुली बजारबाट नयाँ बानेश्वरस्थित निषेधित घेरा नजिक पुगेर प्रदर्शनमा गरेका थिए।
अर्को तर्फ राप्रपाका अध्यक्ष राजेन्द्र लिङ्देनलगायतका नेताहरूले सिंहदबारस्थित संसदीय दलको कार्यालयमा भेला भएर सिंहदरबारभित्रै प्रदर्शन गरेका थिए । उनीहरूले सिंहदरबारभित्रै पर्चासहित प्रदर्शन गरेपछि प्रहरीले राप्रपाका अध्यक्ष राजेन्द्र लिङ्देन, प्रवक्ता ज्ञानेन्द्र शाही र उपाध्यक्ष बुद्धिमान तामाङलाई नियन्त्रणमा लिएको छ । अध्यक्ष लिङ्देन सहितका नेताहरुलाई अहिले जिल्ला प्रहरी परिसर काठमाडौँमा राखिएको छ ।
- न्युज बहार संवाददाता
