फागुन १५, काठमाडौँ । प्रधानमन्त्री पुष्पकमल दाहाल प्रचण्डलाई नेकपा एमालेका मन्त्रीहरुले संयुक्त राजीनामा बुझाएका छन् ।  एमालेको आज बिहान बसेको सचिवालय बैठकले सरकारलाई दिएको समर्थन फिर्ता लिँने र सरकारबाट बाहिरिने निर्णय गरेलगत्तै एमालेका मन्त्रीहरु प्रधानमन्त्रीलाई राजीनामा बुझाउन बालुवाटार पुगेका हुन् ।उपाध्यक्ष विष्णु पौडेल उपप्रधान तथा अर्थमन्त्री सहित अन्य ८ मन्त्री नेकपा एमालेबाट सहभागी थिए । विष्णु पौडेल पुस ११ मा नियुक्त भएका थिए भने अन्य मन्त्रीहरुले माघ पहिलो साता शपथ लिएका ग्रहण गरेका थिए । यस अघी नेकपा राप्रपाले पनि सरकारबाट बाहिरिँदै समर्थन फिर्ता लिइसकेको घोषणा र राजिनामा बुझाइसकेको छ।

उपाध्यक्ष पौडेलले आज पार्टी कार्यालयमा आयोजित पत्रकार सम्मेलनमा बोल्दै प्रधानमन्त्री दाहालले नेकपा एमाले र एमालेले प्रतिनिधित्व गरेका मन्त्रीहरूप्रति गरेको व्यवहार र टिप्पणीका कारण आफूहरू सरकारबाट बाहिरिन बाध्य भएको बताएका थिए । उनले भने, ‘राष्ट्रपतिको निर्वाचनमा सहमति नमिलेको भएपनि सरकारलाई दिएको समर्थन र सहयोग गरेर काम गर्ने सोचमा हामी थियौँ । तर त्यसको ठिक विपरित पछिल्ला दिनमा प्रधानमन्त्रीज्यूले नेकपा एमाले र एमालेबाट प्रतिनिधित्व गर्नु भएको मन्त्रीहरुप्रति गरेको अभिव्यक्ति र व्यवहारले गर्दा हामी सरकार छाड्ने निर्णयमा पुगेका छौं।’

• न्युज बहार संवाददाता